.

  اخر البوم تابعته لكايروكي كان السكة شمال اللي حضرت الحفلة بتاعته وبعدها بطلت اتابعهم تمامًا لأنهم اتغيروا في كل حاجة الكلمات..الموسيقى..الهوية..   انا لسة فاكر احب الالبومات إلى قلبي "وأنا مع نفسي قاعد"  كنت بسمعهم ليل ونهار، في اسوء لحظاتي قبل أفضلها.. كان الكلام حقيقي جدًا ويشبهني جدًا بشكل غريب..كنت ببكي معاهم وبضحك معاهم وكانت اسعد لحظاتي وانا بكرر الكلام وراهم في حفلاتهم..  في مطلع أحد الأغاني من الألبوم دة بيقول:  "أنا مش هنحني ولا هنتمي ليك يا زماني.. أنا مش هتسند ولا هتولد فيك يا زماني"  حسيت قد اية الكلمات دي بتلمسني حتى دلوقتي بشكل خلاني كنت على وشك البكاء..  اللي هو الانسان فعلًا مش بيحتاج ينبسط بقدر ما هو بحاجة انه يتفهم..  ان كلمات اغاني مهمشة من اللي كتبوها نفسهم ممكن تأثر فيك.. شيء مأساوي وفي نفس الوقت ساحر بشكل مرعب.